Ikasleek egindako “Leihotik” film laburra Trueba zinema aretoan estreinatuko dute


Berri pozgarria jaso dugu aste honetan, jakin dugunean Ikus-entzunezko Komunikazioko ikasleen lan bat pantaila handian estreinatuko dela. Kresala Zineklubak otsaila eta martxorako hainbat emanaldi antolatu ditu, eta martxoaren 20an, Donostiako Trueba zinema aretoan estreinatuko da 4.mailakoek ekoiztutako film labur bat, beste 6 lanekin batera. Leihotik deitzen den film laburra Nekane Muñoz ikasleak zuzendu du eta Irene Arinek, Ana Urkolak, Ane Alberdik, Paul Arzanegik, Ane Aierbek eta Maider Navarrok osatzen dute lan taldea.

Film laburra ikusteaz gain, gidoia idatzi eta zuzendu duen ikaslearen hitzaldia egongo da eta istorioaren sekretuak ezagutzeko aukera paregabea izango da: zein den istorioaren inspirazio iturria, nola sortu dituen pertsonaiak, eta abar.

Leihotik atabala

Leihotik istorioaren jatorrian memoria galeraz hitz egiten da, eta horien inguruan sortzen diren harremanez. Zeren, zer gertatzen da oroitzapenak galtzen direnean? Edo, zer gertatzen da oroitzapen batzuetan giltzapetuta geratzen bagara? Azken batean, barrurako gordeta dauden oroitzapenak azaleratzen dira film labur honetan, eta itzaltzen ari den memoria ere ageri da, bidearen amaieran, oraindik ere zentzua hartu nahiko balu bezala.

Kontakizun guztia hiru protagonistek garraiatzen dute istorioan:

Loli Astoreka: Maritxu izango da Loli. Bakarrik bizi da, eta bere alabekiko menpekotasuna dauka. Izan ere, memoria arazoak dauzka. Hala ere, bada pertsona bat, toki bat, momentu bat, Maritxuk betirako iltzatua izango duena, oroitzapenak ez baitira hain erraz galtzen.

Amaia Irazabal: Leoren papera betetzen du Amaiak, eta Maritxuren alaba da. Ama oso garrantzitsua da berarentzat, eta serio hartzen du bera zaintzeko lana. Goxoa izaten saiatzen da beti, baina, noizbehinka, haserretu ere egiten da. Badaki noizbait gertatuko dela, baina ama galtzeko beldur da.

-Agurtzane Intxaurraga: Agurtzane Mertxe da, Maritxuren beste alaba eta Leoren ahizpa. Emakume serioa da, langilea,  eta denbora asko kentzen dio horrek oso lanpetuta bizi da beti. Horregatik, eta betiko moduan, eztabaidan amaitzen du bere ahizpa Leorekin. Pertsona hotza dirudi, baina barrenean,  badaki amak zer garrantzia duen beretzat eta barne gatazka asko bizi ditu horregatik.

Gonbitea

Leihotik film laburra ekoiztu duen lan-taldeak gonbitea bidali digu martxoaren 20ko ekitaldira joateko, oso pozik daude-eta beraien parte hartzearekin, hemen haien hitzak: “guk produzitutako lehenengo laburmetraia hainbeste lanen artean aukeratua izatea oso pozgarria da guretzat. Oso gustura eta eroso egon gara lan-taldean lanean eta emaitzarekin oso pozik gaude”.

Zorion beroenak talde guztiari!

+ Ez dago iruzkinik

Zurea gehitu