Mikro-momentuak: Youtuberren eta marken arteko arrakastaren oinarria


Smartphonen erabilera egunetik egunera hazten dabilela ukaezina da gaur egun, datuek euren kasa hitz egiten dute: millenialen %87ak beti darama aldean telefono mugikorra, gau eta egun; erabiltzaileen bi herenak (%68) dio goizean goiz esnatu ondorengo 15 minutuetan begiratzen duela lehengo aldiz sakelekoa eta %30ak onartzen du “urduri” jartzen dela mugikorra gainean ez badarama.

Esan ohi da batez beste egunean 150 bider begiratzen dugula geure mugikorra, eta egunero 177 minutu inbertitzen ditugula guztira sakelekoa erabiltzen. Bi datu hauek uztartuz gero konturatuko gara mugikorrak erabiltzen ematen dugun sesio edo aldi bakoitzaren iraupenak ez duela minutu bat eta 10 segundo gainditzen; aitzitik, sesio hauek dozenaka bider egiten ditugu.

Erabilera bakoitzean, erabiltzaileok oso arrazoi eta helburu konkretuak dauzkagu (informazioa jaso, dendara joan, erosketa bat egin, zerbait partekatu..), eta momentu horretan behar duguna asetzeko mugikorra erabiltzen dugu. Googlek “mikro-momentuak” kontzeptua erabiltzen du fenomeno hau izendatzeko.

Korronte honen jatorria ez da kasualitatea, izan ere kontsumo ohiturek erakusten dute aldi bakarreko eduki sakonak baino, nahiago ditugula maiztasun handi eta dosi txikiko edukiak. Hauxe da egun dauden sare-sozialik arrakastatsuenek (Twitterrek, Instagramek, Snapchatek…) jarraitzen duten formula: eduki oso arineko etengabeko jarioa.

Hau da gaur egun markek duten bataila-eremu berria, eta erabiltzailearentzat mikro-momentuak lortzen saiatzeko Matt Lawsonek (2016) enpresek jarraitu beharreko hiru estrategia proposatzen ditu:

Presente egon:
Industria bereko erabiltzaileen mikro-momentuei aurrea hartu behar die markak eta behin momentu horiek gertatzen direnean laguntza eskaintzeko prest egon behar dira.

Baliagarria izan:
Marka gai izan behar da erabiltzaileak momentu konkretu horretan dituen beharrei erantzuna emateko eta, horretarako pertsonak konektatu behar ditu bilatzen ari diren edukiekin.

Bizkortasunez lan egin:
“Mikro-momentuak” diren neurrian, sakeleko telefonoen erabiltzaileek denbora tarterik laburrenean informazioa jaso, dendara joan eta erosketa egin nahi dute. Horregatik, smarphonetako esperientzia bizkorra eta oztoporik gabekoa behar litzateke.

Youtuberren eztandarekin, negozio-eredu berri hau modu arrakastatsuan praktikara eramateko pista ugari geratu dira agerian. Hamarkada hasieran markek influencerrak (gizartean nolabaiteko eragina duten eragileak) bilatzen asmatu zuten, eta hauek kanal modura erabilita euren produktu eta zerbitzuen irisgarritasuna ordura arte lortu ez zen publikoetara hedatzea lortu zuten.

Aitzitik, product placementak fama txarra du, eta hasiera batean ondo funtzionatu bazuen ere, gaur egun dagoeneko irenstea gero eta gehiago kosta egiten zaigu. Horregatik, youtuberrak produktu bat saldu nahi digun susmoa piztu orduko askotan kentzen dugu bideoa.

Markek edota Youtuberrek beraiek, ordea, euren jardunarekin modu finago batean jarraitzeko formula berriak bilatzen dituzte. Gakoa? Transmediaz baliatzea, eta Lawsonek dioen lehenengo estrategiari jarraiki, sare sozial desberdinetan presente egotea. Horregatik, askok erabaki dute euren bideoetan hasierako estilo leial eta ez-komertzialari eustea, eta aldiz, oso ohikoa da beste sare sozial batzuen bidez haien eguneroko mikro-momentuen berri ematea marken mesedetan: Esate baterako, Instagrameko argazkian jantzita daramazun arropa edota osagarrien markak zehaztea, kafea hartzera joan zaren kafetegia aipatzea, larunbat gauean joateko asmoa duzun diskotekaren izena aipatzea.

 

Eguna ehunka edo milaka mikro-momentuz osatuta dago, eta Youtuberraren eguneko errelato osoa osatzen duten mikro-momentuen barruan kamuflatuta geratzen da marka desberdinen eragina kasu gehienetan.

+ Ez dago iruzkinik

Zurea gehitu