Sarri, hitzez eta ahotsez

Maiatzaren 9an bukaera eman zaio “ Sarri, hitzez eta ahotsez” egitasmoari. Egitasmo honek Hezkuntza eremu eta pertsona anitzen parte hartzea eta ezagutza partekatzeko bilgunea izatea lortu du eta Hezkuntza formala eta ez formalen arteko zubiak eraikitzeko adibide eredugarria dela iruditzen zaigu.

Ixone Aroma  Berrimet  Masterreko  ikasleak  Master Amaierako Proiektua ekimen honen inguruan garatu du.

Hona hemen proiektu honen inguruan berarengandik jaso ditugun informazioak:

Egitasmo honen helburu nagusia herritarrok literaturara hurbiltzea da. Hau guztia modu lasai eta giro atseginean egin nahi genuke, parte hartzera animatzen garenok literaturaz goza dezagun.

Lehen zita honetarako Joseba Sarrionandiaren lana aukeratu dugu hainbat arrazoirengatik. Besteak beste, Euskal Literaturan erreferente delako, herrikoa izanik hurbil sentitzen dugulako, eta gure gustuko idazlea delako.

Programa

Otsailean abian jarritako proiektuak hiru atal izan ditu. Hasteko, Joseba Sarrionandiaren lanaren inguruko hitzaldia entzuteko aukera izan genuen Joxemari Iturralderen eskutik. Berbaldi hartan, Iturraldek Joseba Sarrionandiaren lanaren inguruko zenbait zertzelada eman zizkigun.

Iturralderen berbaldia

Martxoaren 12 eta apirilaren 2an solasaldi dialogikoak egin genituen. Solasaldi hauetan parte hartze zabala lortu gura genuenez, izena emateko helbide elektroniko bat ireki genuen. Gure literaturako hainbat autore irakurtzeko beldurra kendu eta hauen lanak ulertzeko gai garela ikusarazi nahi izan dugu.

Lehena Durangoko Udal Bibliotekan egin genuen eta bertan 15-70 urte bitarteko 24 pertsonak parte hartu genuen. Bigarrena, Izurtzako Etxaburu dorretxean egin genuen, solasaldirako irakurritako narrazioetako bat bertan kokatzen zelako eta kasu honetan 30 lagun batu ginen.

Azken ekintza, sei orduko jendaurreko irakurketa etenbakoa izan zen, maiatzaren 9an, Plateruena Kafe Antzokian. Saioan, Sarriren hainbat liburutako pasarteak irakurri genituen (narrazioak, poemak…), baita abestu ere. Adin zein pentsamolde desberdineko jendea, egitasmo berean bilduta.

Irakurketa dialogikoa

Herri ekimen hau aurrera eramatea, parte hartu duten guztiei esker izan da posible. Guztira ia 200 lagun aritu ginen Sarrionandiaren hitzei ahotsa jartzen. Eta guztia antolatu eta koordinatzen zortzi laguneko lan-taldea: Goiuri Iturriza, Xabier Boveda, Asun Elorriaga, Miren B. Erzilla, Ziortza Aldekoa-Otalora, Jon Gorritxategi, Marisa Barrena eta Ixone Aroma.

Jendaurreko irakurketa

Komunikabideetan

Ekimen honen berri hainbat komunikabideetan eman dute: Anboto aldizkarian argitaratutakoak daude jarraian:  Anboto 1 , Anboto 2 ; Anboto 3