Zer da Ekoingeniaritza?

Ekoingeniaritzak teknologia eta prozesu jasangarriak garatu eta erabili nahi ditu, ingurugiroarekiko inpaktua gutxitu asmoz.

Jasangarritasuna hizpide da gure gizartean azken urteotan. Akaso, ez krisia beste, baina krisiak berak parada eman die ditugun baliabideen zaintzari eta dugun energia mendekotasunari merezi duten garrantzia emateko. Legedia aspaldi zorroztu zen ingurugiroaren inguruan, industriari kutsadura mailak kontrolatuz adibidez. Orain berriro indartsu dator ingurugiroa zaintzeko premia, bai energiaren ikuspuntutik, bai erabiltzen ditugun baliabide eta kutsaduraren alorrean.

Nork ez du entzun energia berriztagarrien inguruan? Eta produktu edo prozesu baten karbono aztarna zer den ba al dakizue? Ba hau guztia eta gehiago da Ekoingeniaritza. Ingeniaritza tradizionalarekin alderatuz, Ekoingeniaritzaren helburu nagusia prozesu, produktu eta sistema jasangarriak lortzea da; beste era batera esanda, gizakia eta bere ingurunea hartzen dituen ekosistema jasangarriak diseinatzea da.

Batetik energiaren menpekotasuna dago, eta hau ekiditeko, energia berriztagarri eta ez kutsatzaileak gure energia iturri nagusi bilakatu behar dira. Baina gakoa ez dago bakarrik energia berriztagarrien erabilpenean, energia arrazoizko moduan kontsumitzeko eredu berriak bilatzen baizik. Honela, erabiltzen dugun energiaren gestioa optimizatzea lortu behar dugu nagusiki.

Bestetik, gure bizitzan behar ditugun produktuak, autoak direla, makinak, etxetresnak, bizikletak, etab modu eraginkorrean lortzea izan behar dugu helburu, gai toxiko edo kutsakorrak erabili gabe, material birziklatu edo jasangarriak hautatuz, produktuen sorrera eta eraldaketan ahalik eta baliabide gutxienez baliatuz, etab.

Mondragon Unibertsitatean 2013-2014 ikasturtean abiatuko diren bi graduek gai hauek jorratuko dituzte. Bata energiaren inguruko ekoingeniaritza da, eta bestea, industria prozesuetan ekoteknologiak ezartzean datza, modu garbi eta efizientean sor ditzagun behar ditugun gaiak.