Beste galdera askok bezala, 2 erantzun posible ditu honek:
Ez: ingeniaritza beti joango da ingurugiroa zaintzearen kontra
Gaur egun, dirua lortzeko gauzak saldu, erosi, mugitu eta sortu behar ditugu. Batez ere sortu. Zenbat eta gehiago sortu, orduan eta diru gehiago. Zenbat eta gehiago sortu, gero eta hondakin gehiago, kutsadura gehiago, energia gehiago erabiltzen da…
Eta gauzak sortzeaz arduratzen da ingeniaritza: yogurrentzako plastikoak, autoak, boligrafoak, papera, smartphone-ak, bizikletak, igogailuak, giltzak, aldizkariak, betaurrekoak, elektrizitatea, radiografiak ateratzeko makinak, birziklatzeko produktuak eta bururatzen zaizkizuen guztiak ingeniaritzak sortzen ditu.
Zenbat eta gehiago sortu, orokorrean, orduan eta diru gehiago. Eta jendeak gero eta diru gehiago nahi duenez, gero eta gehiago sortu. Eta hori ez da sustengagarria. Beraz, ingeniaritza bat sekula ez da ekologikoa izango.
Bai: ingeniaritzak mundua garbiago bilakatu dezake.
“Zertarako fabrikatuko dugu zukugailu bat? Hori ez da ekologikoa: hobeto da laranjak zure esku hutsekin estutu eta zukua lortu. Horrela produktu bat gutxiago fabrikatuko da!”
Uste dut inork ez duela zukua bere eskuekin egin nahi, ezta? Eta smartphone-n bateriak ez dira oso “garbiak” ezta, baina denok nahi dugu smartphone bat, ezta?
Ingeniaritzak gure bizitza hobetu du. Denok onartuko dugu automobilek, adibidez, onura bat ekarri ziotela gure gizarteari. Baina ingurugiro arazo bat ere ekarri zuten, eta hori konpondu behar dugu. Autoak arinagoak izan behar dute (70 kg-tako pertsona bat garraiatzeko 2000 kg-ko auto bat behar dugu?!?), eta motorrak garbiagoak (gure herria tximiniaz betetzen dute!), eta bizitza luzeagoa izan beharko dute: hori da gaur egun ingeniaritzaren helburua (helburuetariko bat).
Bada zati bat gizarteari dagokiona: garraio publikoa gehiago erabili beharko genuke, eta hori ez dagokio ingeniaritzari. Baina ingeniaritzak autobus hobeagoak eta garbiagoak egiteko ardura izan beharko du.
Hortan sinisten dugu guk: material garbi eta arinak eta bizitza luzekoak erabiltzen ikasi nahi dugu, konpositeak edota banbua kasu; airea eta ura garbiagoa bilakatu nahi dugu, eta hori zelan lortu daitekeen ikasi nahi dugu; material gutxiago erabiltzen eta erabilitakoa birziklatzen ikasi nahi dugu; produktuak garbiak izan daitezen eta birziklagarriak eta bizitza luze izan dezaten diseinatzen ikasi nahi dugu.
Lagunduko al diguzu?