Fitxategien edukien arabera bilatu eta aurkitu!!


Linux sistema eragilea erabiltzen duenak ziurrenik badaki “grep” izeneko programatxo bat dagoela. Beharbada erabili izan duzue noiz edo noiz. Edo agian sekulako maisuak zarete bere erabileran.

Windows-eko erabiltzaile arruntak, ordea, ez daki horrelako erremintarik existitzen denik ere. Sistema eragilearekin antzeko gauzak lortzeko aukera badago (dir eta find komandoak erabilita), baina ez da berdina. Eta gainera, komando lerroa erabiltzeari alergia izan ohi dio jendeak 😉 .

Bada, badaude Windows-erako aplikazioak, inguru grafikoa erabilita, linuxeko “grep” komandoaren lana egiten dutenak. Hemen bat aurkeztuko dizuet (grepWin du izena) adibide gisa. Ez du esan nahi bakarra edo onena denik, badira gehiago eta konbentzitzen zaituztena bilatu eta aukeratzera gonbidatzen zaituztet.

Eta, zer egin daiteke grepWin-ekin? Labur esanda, fitxategiak izena edo edukiaren arabera aurkitu. Zenbait filtro jarri daitezke gure bilaketaren emaitzak murrizteko:

  • Azpidirektoriotako fitxategiak ere bilatu
  • Ezkutuko fitxategiak ere bilatu
  • Sistemako fitxategiak ere bilatu
  • Fitxategi binarioak ere bilatu
  • Edukian izan beharreko testu baten arabera (testu soila edo adierazpen erregularrak erabiliaz)
  • Tamainaren arabera (tamaina X KB baino txikiagoa/handiagoa/berdina)
  • Fitxategiek bete behar duten izena (testu soila edo adierazpen erregularrak erabiliaz)

Aurkitutako hori nola ikusi ere aukeratu dezakegu. Fitxategi izenak soilik interesatzen bazaizkigu, goian aipatutako baldintzak betetzen dituzten fitxategien zerrenda azalduko zaigu.

Bilatzen ari garen testua non aurkitu duen ikusi nahi badugu, fitxategi izena, fitxategi horren barruan zein lerrotan, eta lerro horren testua zerrendatuta azalduko zaigu. Fitxategia binarioa bada, fitxategi izena bakarrik azalduko da.

Bilaketa egiteaz gain, aurkitutako testua beste bategatik ordezkatu dezakegu (fitxategi binariotan ere egiten da ordezkapena, baina nik badaezpada ez nuke egingo).

Adierazpen erregularrekin laguntzeko, test bat egiteko leiho bat ere badago. Bertan, testu lagin baten egingo da bilaketa adierazpen erregularra erabilita. Adierazpena egokitzen joan gaitezke gure beharretara, eta nahi duguna dela uste dugunean, benetako bilaketa egitera pasa gaitezke sortu berri dugun adierazpena erabilita.

Goian esan dudan bezela, hau ez da mota honetako programa bakarra, eta onena ere ez da izango. Zuen esku uzten dut beste aukera batzuk bilatzea, eta zuen gustu eta beharrak betetzen dituena aurkitzea.

Iruzkin 1 dago

Zurea gehitu
  1. 1
    gestion comercial

    Muy interesante el artículo. En una empresa es importante gestionar toda la información y que no se pierda ningún documento valioso. Gracias y saludos

+ Iruzkin bat laga