Ikasleari zuzendutako formazio planak garai berrietara egokitzearen aldeko apustua egiten du Mondragon Unibertsitateak berrikuntza eta ikaslearen autonomia ardatz dituela.
Hezkuntza berrikuntzak dakartzan metodologia berritziale guztien artean, praktikotasuna eta metodologia berriak uztartzen dituzten bide berriak urratzen ari da Mondragon Unibertsitatea, eta fakultate bakoitzak horietako bat aukeratu du zertan datzan adierazteko:
- PBL edo Project Based Learning da Goi Eskola Politeknikoaren eredua eta ikaslea enpresaren errealitatera hurbiltzen du.
- Lan Sekuentzien Metodologia dela-eta Humanitate eta Hezkuntza Zientzien Fakultateak goitik behera berritu du bere ikaste-eredua.
- Dual metodologia da Enpresagintza Fakultatea bestelakoa egiten duen berezitasunetako bat.
- Gastronomian eta elikaduran goi mailako prestakuntza + ikerketa eskaintzea da Basque Culinary Centerren nortasun-ezaugarri nagusietakoa.
MUniversitasaldizkariaren azken aleko ‘Hezkuntza berrikuntza garatzen’ erreportajeak azaltzen dizkigu eredu propio honen nondik norakoak.
Hala, Goi Eskola Politeknikoko ikasleek Project Based Learning (PBL) metodologiarekin enpresetako erronka eta proiektu errealak praktikara ekartzen dituzte eta ikasgelan landutako eduki teorikoak garatu ahal izaten dituzte. Honela, ibilibide akademikoak eta profesionalak bat egiten dute.
Humanitate eta Hezkuntza Zientzien Fakultatean (HUHEZI) Lan Sekuentziak ezarri dira Ikus-Entzunezko graduan. Sekuentzia hauetan erronkak diziplina anitzeko moduletan hezur-mamitzen dira, kasuan kasuko ezagutza, trebetasuna eta konpetentziak eskuratzeko.
Mondragon Unibertsitatea antzindaria da Dual ereduan eta, bereziki, Enpresagintza Fakultatean ari da hartzen indarra azken urteotan; myGADE graduan, zehazki. Enpresen Administrazio eta Zuzendaritza gradua enpresara dago bideratuta, hau da, ikasketa etorkizuneko profesionalak ezagutza garatuko duen lekuan ematen da: enpresan.
Praktikotasunari dagokionez, Basque Culinary Centerrek ere paper oso garrantzitsua jokatzen du. Ikasleak aktiboki hartzen du parte gastronomiaren eta elikaduraren alorrean burutzen den ikerketan zein berrikuntza prozesuan.
5 ikasle, 5 eredu praktiko
Ikaste-esperientzia hauek gertutik ezagutzeko, lau fakultateak ordezkatzen dituzten bost ikasleren bizipenak bildu dira:
- Eider Garcia myGADE graduko bigarren promoziokoa da, eta Arteman Komunikazioan lanean ari da ikasketak burutu bitartean. “Nire ustez praktikotasuna da eredu DUALa berezi egiten duena”, dio MUniversitas erreportaje nagusiko orrialdeetan. “Ikasleak teoria jasotzen du, baina hau aplikatzen jakitea ez da erraza izaten. Horrez gain, enpresa errealitatea barrutik ezagutzea ahalbidetzen digu”, jarraitzen du, “zentzu honetan, ikaslea guztiz protagonista bilakatzen da”.
- Eneko Maguregi eta Aner Urruzuno Goi Eskola Politeknikoko Enpresa Berrikuntza eta Proiektu Zuzendaritza unibertsitate masterreko ikasleak dira eta Industry Based Project Based Learning metodologia aplikatuta, enpresa desberdinentzako erronkak garatu dituzte. Maguregik Embalan enpresarako egindako kolaborazioa kontatzen digu: “Produktuak merkatu berri batera zabaltzeko eskaria egin zigun”. Erronkari erantzuna emateko, talde lanean produktua eta online distribuzioa aztertu zituzten. Urruzunok, aldiz, lau enpresetako hiru erronkei aurre egin behar izan die Kokrea proiektuan: “goiz bakoitzean enpresa bateko ordezkariak etortzen ziren arazoa gurekin elkarbanatzera eta, 10 egunen buruan, erronka horri irtenbidea eman behar genion”. Bukaeran, Tabakaleran aurkeztu zituzten emaitzak.
- Maialen Larramendi Ikus-entzunezko gradua ikasten ari da Humanitate eta Hezkuntza Zientzien, Lan Sekuentzien Metodologiarekin. “Sekuentzia bakoitzak irauten dituen hiruzpalau asteetan ikasleok indar guztia proiektu bakar batean jartzen dugu. Teoria jaso arren, zati handiena praktika bidez egiten da”. Eredu honen funtzionamendua azaldu du eta abantaila handiak dituela azpimarratu du: “askatasuna ematen da nork bere irudimena eta sormena lantzeko”, dio eta gaineratzen du: “proiektu guztiek dute helburu finkoa, baina hori lortzeko bidea ikasle bakoitzak eraikitzen du. Horrez gain, talde lana ere sustatzen du”.
- Adriano Mejia ekuadortarra Basque Culinary Centerreko ikaslea da. Bertan digitalizazioa eta laborategiko lana ezinbestekoak dira. “Biak ala biak produktu, protokolo edo teknika berriak garatzen laguntzen diguten erremintak dira”, dio Gastronomia eta Sukaldaritza Arteak graduko “Hemen, gainera, etengabe ari gara gauzak zalantzan jartzen eta, honi esker, gauzak ulertu, aurkitu eta, ondoren, hauen inguruan berritzeko aukera dugu”, azaltzen du.
Behin gradua edo masterra bukatuta, bizipen praktikoez beteriko motxila daramate berekin Mondragon Unibertsitateko ikasleek. Esperientzia hori lan mundurako guztiz aproposa izango zaie.