Berrikuntza MGEPen: Mekatronikako ikasleek sagardoarentzako prentsa hidraulikoak egin dituzte

MGEP-eko Mekatronika Industrialeko GMHZ 2. mailako ikasleek ilusio handiko proiektu bat burutu dute: sagarra prentsatzeko eta sagardoa ekoizteko lau prentsa eraikitzea.

Aurten Hautazko Modulo berrietako batetan, Materialen Konformazio eta Lotura Aurreratuko Teknologia, moduloan garatu dute. Dena Rafa irakasleak emandako hasierako diseinu mekanikoarekin hasi zen, eta hori izan zen prozesu osoaren oinarria. Diseinu horretatik abiatuta, pieza gehienak Iturripeko tailerretan egin ziren, eta osagai handiagoak eta elementu komertzialak inguruko enpresei erosi zitzaizkien. Nabarmentzekoa da ikasleek fabrikazio-prozesu aurreratuak erabili dituztela xafla-formatuak mozteko, zuntzezko laserra erabiliz (3 Kw).

Piezak bildu ondoren, ikasleek aktiboki parte hartu zuten egitura nagusiaren eta toberaren multzoaren soldadura-lanetan. Aipatzekoa da ikasleek SMAW soldadura- prozesuen bidez karbono-altzairuak eta GTAW prozesu aurreratuen bidez altzairu herdoilgaitzak (AISI 304) soldatzeko trebetasunak eskuratu zituztela. Lan horietan, Ikerrek eta Rafak azalpen zehatzak eta etengabeko laguntza eman zituzten, kalitatezko lan segurua bermatzeko. Horien guztien helburua bastidorearen zurruntasuna bermatzea da, 10 tona inguruko esfortzuak jasateko gai baita.

Muntaketa-fasean, eskuzko erremintek paper nagusia izan zuten: disko-makina, eskuzko zulagailua eta xafla konformatzeko beste makina batzuk (tolesteko makina eta kurbatzeko makina) funtsezkoak izan ziren egituraren osagaiak doitzeko.

Bastidorea osatu ondoren, instalazio hidraulikoari ekin zitzaion. Horretarako, presio-zirkuituaren parte izango ziren hainbat hodi hidrauliko eskuz tolestu ziren, eta hodi bakoitza bere errakoreekin hornitu zen, konexio guztietan estankotasuna ziurtatzeko. Sistema hidrauliko osoa proiekturako eskuratutako multzo hidrauliko batekin integratu zen, eta beharrezko indarra sortzeko tamaina handiko 2 zilindro hidrauliko erosi ziren, prentsako presioaren bidez sagarrak zapaltzeko. Fase honetan, segurtasun-neurriak zorroztu dira, egindako presio altuek eragindako kalteak bermatzeko (200Bar).

Astetako lan koordinatuaren ondoren, azken muntaiak eta beharrezko doikuntzak egin ziren, eta prentsa hidraulikoak martxan jarri ziren.

Emaitza esperientzia oso motibagarria izan da, eta ikasleen eskuzko tresnen erabileran eta benetako industria-makineria fabrikatzen trebatzen lagundu du.

Proiektu honek ikaskuntza teknikoa ez ezik, pertsonala ere ekarri du, eta horregatik, eskerrak eman nahi dizkiegu Rafa eta Iker Diegori egindako lan bikainagatik.