“Iberdrolaren Gazte Programak” energiaren sektorea hurbiltzen die MGEPeko Energia Berriztagarrietako ikasleei

Saioan zehar, adituak sistema elektrikoaren ikuspegi orokorra eskaini zien ikasleei, eta hura osatzen duten arlo nagusiak azaldu zituen. Besteak beste, energiaren sorkuntza prozesuak, tentsio ertaineko eta behe tentsioko sareak, transformazio zentroak eta bezeroen instalazioak landu ziren, baita horiekin lotutako ustiapen eta mantentze lanak ere.

Era berean, laneko arriskuen prebentzioa, instalazio elektrikoetako segurtasuna, ingurumenaren babesa eta Iberdrolak deskarbonizazioaren eta trantsizio energetikoaren alde duen konpromisoa bezalako gai garrantzitsuak jorratu ziren.

Jardunaldiak lan merkatura hurbiltzeko tartea ere izan zuen. Horri esker, ikasleek energia sektorean gehien eskatzen diren profil profesionalak, beharrezko gaitasunak eta garapen profesionalerako aukerak ezagutzeko aukera izan zuten.

Iberdrola Gazte Programa bezalako ekimenen bidez, MGEPk enpresa-ingurunearekiko duen lotura sendotzen jarraitzen du, ikasleei sektorearen benetako egoera gerturatuz eta haien prestakuntza lan merkatuaren beharretara egokituz.