Moodle, komunitatean oinarrituriko indarra
Zuetariko gehienak Moodle zer den jakingo duzue jada (bestela hemen informatu zaitezkete), baina ez da hain ezaguna Moodle-n inguruan bildurik dagoen komunitatea dela plataformaren arrakastaren gako garrantzitsuetako bat.
Komunitatea plataformaren hainbat alderditaz arduratzen da, eta post honetan alderdi horietako batzuri begiratu bat emango diegu komunitateak eskeintzen duena ezagutarazteko eta, bide batez, komunitate horretan parte hartzera animatzeko, noski!
Goazen bada horietako batzuren errepasoa egitera:
Dokumentazioa eta foroak, komunitatearen jakituriaren kudeaketa
Moodle-n aukera ezberdinak azaltzeko dokumentazioa MoodleDocs webgunean aurkitu daiteke hainbat hizkuntzatan. Dokumentazio guztia wikietan antolaturik dagoenez, erabiltzaileok dokumentazio hori osatu eta hobetu dezakegu. Dokumentaziorik osatuena ingelesez dagoena da, baina gure esku dago beste hizkuntzatan dagoena osatzea, 😉
Era berean, Moodle-n inguruko zalantzak argitzeko Moodle.org-n laguntza foroak daude, eta bertan komunitateko arlo desberdinetako kontuak lantzen dira (Moodle-n erabilerari buruzkoak, instalazio eta administrazioari buruzkoak, garapenak egitearen ingurukoak,…). Hemen ere jendearen parte hartzea ezinbestekoa da erantzunik gabeko zalantzarik geratu ez dadin, eta komunitate aktiboena ingeles hiztunena denez beste hizkuntzak jakinda ere askotan ingelesera jotzen dugu galderak egiteko (erantzunak jasotzeko aukerak altuagoak direlako).
Lokalizazioak, komunitate eleanitz batetan elkar ulertzen
Moodle proiektuaren muinaren garapena MoodleHQ-etan egiten da, Australian, eta beraz ingelesa da euren hizkuntza nagusia. Horregatik, komunitateak hartzen du Moodle beste hizkuntzetara lokalizazioak egiteko ardura.
Euskararen kasuan Abel Camacho eta Pedro Lonbide dira lan hau bideratzen dutenak (hemendik eskerrik beroenak bidaltzen dizkiet egiten duten lanagatik!). Lokalizazio horretan laguntzeko prest egon ezkero Moodle Euskaraz foroetan sartu eta zuen burua aurkeztu besterik ez duzue egin behar.
MoodleMoot-ak, komunitateak bultzatutako esperientzia trukaketak
Komunitate birtual guztietan bezala, noizean behin topaketa fisikoak egitea eta elkar ezagutzea garrantzitsua da, ezagun digitalei “aurpegia” jartzeko, esperientziak trukatzeko,…
Moodle-en kasuan, topaketa hauek MoodleMoot izena hartzen dute, eta gurean MoodleMoot EU eta MoodleMoot ES antolatzen dira urtero, urte bakoitzean komunitateko nodo batek antolaturik. Esaterako, azkenengo MoodleMoot EU-a HETEL-ek antolatu zuen Txorierri Ikastetxean (mooteu12), eta UEM-ek antolatu zuten pasadan astean izan zen mootes12-a.
Pluginak, komunitatea Moodle zabaltzen
Moodle software librea denez (GPL lizentziapean dago), edonork dauka Moodle erabili, aldatu, zabaldu eta hobetzeko aukera (link).
Askatasun hori baliatuz, Moodle-n inguruan mila eta bat funtzionalitate duten plugin-ak sortu dira. Moodle Plugins Directory webgunean plugin horietako asko topatu daitezke, euren funtzionalitatearen arabera antolaturik, eta gure gustoko direnak bertatik jeitsi eta erabili daitezke.
Tracker-a, komunitatea software-a hobetzen lagunduz
Dagoen software guztiarekin gertatzen den moduan Moodle ere etengabeko hobekuntza prozesuan dago, aurkituriko arazoei konponbidea jartzen, funtzionalitate berriak martxan jartzen, etabar. Lan hau antolatzeko Tracker erreminta erabiltzen du Moodle-k, eta bertan arazo eta funtzionalitate berrien artean garrantzitsuenak identifikatu eta lehenesten dira erabiltzaileen bozken bidez.
Normalean arlo honetan administratzaile eta garatzaileak gara gehien ibiltzen garenak, baina bestelako profil batzuen parte hartzea oso interesgarria izan daiteke ere, funtzionalitate berrien proposamenak egiteko adibidez.
Ikusten denez, Moodle-n komunitatea oso aktiboa da baina beti dago kide berriak jasotzeko prest, beraz zuk ere komunitatearen parte izan nahi baduzu ongi etorria izango zara!
+ Ez dago iruzkinik
Zurea gehitu